في الوقت اللي كنت واقف فيه بتشيل الناس علشان تعديهم من الشارع الغرقان مقابل جنيه واحد، اجتمع خبراء الاقتصاد في بلدك علشان يخفضوا قيمة الجنيه ده عشر قروش بحجة إنقاذه.

في الوقت اللي أنت ممكن تضحي فيه بحياتك علشان تحصل على الجنيه، كانوا هم بيفكروا إزاي ينقذوا نفسهم من انهياره اللي تسببوا فيه.

عزيزي “رجل المطر”

كان فيه واحد شبهك، شمس الضهرية لاسعة قفاه برضو وتراب الأرض مشقق قدمه، كان واقف على ناصية شارع “محمد محمود” بيبيع الخمس طوبات جاهزين للحدف بنفس الجنيه، وكان فيه واحد شبهكم بس عمره أصغر واقف قرب وزارة الداخلية بيبيع مناديل ورق للثوار.

المصري اللي قرر يعرض حياته للخطر مقابل حصوله على الجنيه، هو نفس المصري اللي عاش عمره كله يتحايل على الرزق علشان يعوض غياب العدالة الاجتماعية اللي اتحرم منها.

عزيزي “رجل المطر والوحل”

أنت البطل الوحيد اللي عامل قيمة للجنيه يا عزيزي، لولا بطولتك كان زمان البلد دي وقعت من عقود طويلة، لكن زي ما أنت البطل اللي ساندها من الانهيار.. أنت برضه سبب أساسي في نكبتها، مش بس لأنك بتلاقي رزقك من فتات مصايبها، لكن كمان لأنك ساعدت المحترم اللي أنت شيلته على كتفك وعديته، إنه يعتمد عليك في حل مشكلته وترك المسئول عنها.

المحترم ده اللي يقدر يديك الجنيه، لو اضطر يعدي الشارع الغرقان لوحده، هيروح يطالب بحقه من حكومته الفاشلة في آداء مهامها.

المحترم اللي بيقدر يديك الجنيه علشان تشيله مايختلفش كتير عن اللي بيديك نفس الجنيه علشان تنتخبه.

عزيزي “رجل المطر والوحل والمرحلة “

بطل الزمن الرديء اللي بنعيشه، أنا عارفة إنك مش هتقرا كلامي، لأنك -في الأغلب- مابتعرفش تقرأ ولأنك مشغول بإبداعك في ابتكار طريقة مبتكرة جديدة للحصول على الجنيه اللي بيساوي حياتك.. حياتك اللي قلت عشر قروش.

في الحقيقة أنا فكرت اكتب لك الرسالة دي علشان يقراها كل محترم بيمد إيده ويديك الجنيه، علشان تحل له مشكلته بشكل مؤقت، وناسي إن مسئولية حلها مش عندك أنت.

المحترم اللي استسهل يشيلك مسئولية فشل حكومته على حساب حقك في كرامتك، وحقك في العدالة الاجتماعية، وهو كل يوم بيلعن ثورة نادت بمطالب علشانك وعلشانه.. تخاذله ده هو في الحقيقة عامل أساسي في إنك بتضحي بحياتك علشان تعيش.

إنت واخد بالك من العبث اللي إحنا فيه؟! إنت بتضحي بحياتك علشان تستمر في الحياة، وهو بيضحي بالجنيه -اللي مالوش قيمة غير عندك وعنده- علشان يستمر في الحياة، هو كمان وكلنا بنضحي بكل حاجة علشان حكومة فاشلة تستمر في الحياة، لأننا خايفين من الانهيار، اللي إحنا في الحقيقة عايشين فيه.. كل ده علشان خاطر عيون الجنيه اللي مابقاش له قيمة بفضل سياساتنا الاقتصادية الفاشلة.